बांधकाम कामगारांच्या मुलांना मिळणार ४९ शैक्षणिक वस्तूंचा संच! शासनाची प्रशासकीय व वित्तीय मान्यता
इयत्ता पहिली ते आठवीच्या विद्यार्थ्यांना शैक्षणिक साहित्याचा लाभ; नोंदणीकृत सक्रिय बांधकाम कामगारांच्या पहिल्या दोन पाल्यांसाठी ‘मूलभूत वस्तू संच सहाय्य योजना’ लागू होण्याचा मार्ग मोकळा
महाराष्ट्र इमारत व इतर बांधकाम कामगार कल्याणकारी मंडळामार्फत नोंदणीकृत सक्रिय (जिवित) बांधकाम कामगारांच्या (Mahabocw) पाल्यांसाठी राबविण्यात येणाऱ्या ‘मूलभूत वस्तू संच सहाय्य योजने’ला शासनाने महत्त्वपूर्ण प्रशासकीय व वित्तीय मान्यता दिली आहे. या निर्णयामुळे बांधकाम कामगारांच्या मुलांना शैक्षणिक साहित्याच्या स्वरूपात मदत मिळण्याचा मार्ग मोकळा झाला असून आर्थिकदृष्ट्या सामान्य परिस्थितीत असलेल्या कुटुंबांना मोठा दिलासा मिळणार आहे.
(ads)
केंद्र शासनाने कामगारांसाठी लागू केलेल्या चार नवीन कामगार संहितांच्या पार्श्वभूमीवर सामाजिक सुरक्षा संहिता २०२० अंतर्गत बांधकाम कामगारांच्या पाल्यांसाठी शैक्षणिक योजना राबविण्याची तरतूद करण्यात आली आहे. त्यानुसार महाराष्ट्र इमारत व इतर बांधकाम कामगार कल्याणकारी मंडळाने सध्याच्या शैक्षणिक सहाय्य योजनेत सुधारणा करून विद्यार्थ्यांना रोख रकमेऐवजी वस्तू स्वरूपात शैक्षणिक साहित्य उपलब्ध करून देण्याचा प्रस्ताव शासनाकडे सादर केला होता.
(ads)
या प्रस्तावाला शासनाने मान्यता दिली असून, इयत्ता पहिली ते आठवीमध्ये शिक्षण घेत असलेल्या नोंदणीकृत सक्रिय बांधकाम कामगारांच्या पहिल्या दोन पाल्यांना या योजनेचा लाभ मिळणार आहे.
४९ वस्तूंचा शैक्षणिक संच मिळणार
या मूलभूत वस्तू संचामध्ये विद्यार्थ्यांच्या शैक्षणिक गरजा लक्षात घेऊन एकूण २२ प्रकारच्या वस्तूंचा समावेश करण्यात आला आहे. त्यामध्ये पाण्याची बाटली, गरम-थंड पाण्यासाठी थर्मास, टिफिन बॉक्स, छत्री, रेनकोट, परीक्षेसाठी पॅड, लॉगबुक, ड्रॉईंग बुक, बॉलपेन बॉक्स, पेन्सिल बॉक्स, भूमितीचा कंपास, ऑईल पेस्टल्स, पोस्टर कलर, ब्रश संच, प्लास्टिक पट्टी, सोलर लॅम्प, कॅल्क्युलेटर, फोल्डिंग अभ्यास टेबल, दोन मार्करसह व्हाईट बोर्ड, गजराचे घड्याळ, शाळेची बॅग आणि किट बॅग आदी साहित्याचा समावेश आहे. या संचात एकूण ४९ वस्तू विद्यार्थ्यांना उपलब्ध करून देण्यात येणार आहेत.
(ads)
बांधकाम कामगार कुटुंबांतील विद्यार्थ्यांना शैक्षणिक आधार
बांधकाम क्षेत्रात काम करणाऱ्या कामगारांची आर्थिक परिस्थिती लक्षात घेता, मुलांच्या शिक्षणासाठी लागणाऱ्या साहित्याचा खर्च अनेक कुटुंबांसाठी आव्हानात्मक ठरतो. अशा परिस्थितीत शासनाच्या या निर्णयामुळे विद्यार्थ्यांना शालेय उपयोगाच्या आवश्यक वस्तू उपलब्ध होण्यास मदत होणार आहे. परिणामी विद्यार्थ्यांच्या शिक्षणाला प्रोत्साहन मिळून त्यांच्या शैक्षणिक प्रगतीसाठी हातभार लागणार आहे.
(ads)
एकूणच, बांधकाम कामगारांच्या पहिल्या दोन पाल्यांसाठी राबविण्यात येणारी ही योजना कामगार कुटुंबांसाठी दिलासादायक ठरणार असून विद्यार्थ्यांच्या शैक्षणिक गरजा पूर्ण करण्याच्या दृष्टीने महत्त्वपूर्ण पाऊल मानले जात आहे.
