चिनावल येथे भंते आणि समाजबांधवांच्या उपस्थितीत वृक्षारोपण; दिवंगत व्यक्तीच्या स्मृतींना अनोखी आदरांजली
चिनावल, ता. रावेर : येथील कालकथित भीमराव गिरधर भालेराव यांचे दिनांक २२ ऑक्टोबर २०२६ रोजी दुःखद निधन झाले. त्यांच्या स्मृती सदैव जिवंत राहाव्यात, या भावनेतून भालेराव परिवाराने एक स्तुत्य आणि प्रेरणादायी उपक्रम राबविला. दिवंगत भीमराव भालेराव यांच्या आठवणींना उजाळा देत त्यांच्या निवासस्थानी नारळाच्या झाडाची लागवड करून त्यांना अनोखी आदरांजली अर्पण करण्यात आली.
(ads)
चिनावल येथील किरण भीमराव भालेराव, अनिल भालेराव आणि समस्त भालेराव परिवाराच्या वतीने आयोजित या उपक्रमावेळी अनेक भंते नागवंश महाथेरो,नागपूर तसेच समाजबांधव उपस्थित होते. दुःखाच्या प्रसंगातही पर्यावरण संवर्धनाचा सकारात्मक संदेश देणाऱ्या या कृतीचे महत्त्व विशेष आहे.
(ads)
आजच्या काळात पर्यावरणाचा समतोल राखणे, वृक्षसंवर्धन करणे आणि पुढील पिढ्यांसाठी हिरवेगार पर्यावरण निर्माण करणे अत्यंत आवश्यक आहे. अशा परिस्थितीत आपल्या प्रिय व्यक्तीच्या स्मृती जपण्यासाठी वृक्षारोपणाचा मार्ग निवडणे ही समाजासाठी अनुकरणीय बाब आहे. लावलेले झाड जसजसे वाढेल, तसतशा दिवंगत भीमराव गिरधर भालेराव यांच्या आठवणीही परिवाराच्या मनात सदैव ताज्या राहतील.
(ads)
स्मृतींचे रूपांतर वृक्षात आणि दुःखाचे रूपांतर समाजोपयोगी कार्यात करणाऱ्या चिनावल येथील भालेराव परिवाराच्या या उपक्रमातून पर्यावरण रक्षणाचा संदेश देण्यात आला आहे. इतरांनीही अशा उपक्रमांचा आदर्श घेऊन आपल्या प्रिय व्यक्तींच्या स्मरणार्थ वृक्षारोपण करावे आणि निसर्ग संवर्धनासाठी हातभार लावावा, अशी अपेक्षा व्यक्त होत आहे.
