भालोद येथे डॉ. बाबासाहेब आंबेडकरांच्या ऐतिहासिक भेटीच्या स्मरणार्थ ‘प्रेरणास्तंभ व प्रेरणाभूमी’ उभारण्याची मागणी : आमदार अमोल जावळे यांना निवेदन

राष्ट्रीय स्तरावरील स्मारकासाठी मुख्यमंत्री व संबंधित मंत्र्यांशी चर्चा करणार

भालोद (सुवर्ण दिप वृत्तसेवा) : भारतीय राज्यघटनेचे शिल्पकार डॉ. बाबासाहेब आंबेडकर यांनी २२ ऑक्टोबर १९२९ रोजी भालोद गावाला आणि येथील न्यू इंग्लिश स्कूलला भेट दिली होती. या ऐतिहासिक भेटीचे स्मरण जतन करण्यासाठी भालोद येथे ‘प्रेरणास्तंभ व प्रेरणाभूमी’ उभारण्यात यावी, अशी मागणी भीम स्मृती संवर्धन समितीच्या वतीने करण्यात आली आहे. यासंदर्भातील निवेदन समितीचे मुख्य संयोजक तथा प्रसिद्ध साहित्यिक जयसिंग वाघ यांनी यावल-रावेर मतदारसंघाचे आमदार अमोल जावळे यांना भालोद येथे सादर केले.

(ads)

राष्ट्रीय स्तरावरील स्मारकासाठी प्रयत्न करणार – आमदार अमोल जावळे

निवेदनावर चर्चा करताना आमदार अमोल जावळे यांनी डॉ. बाबासाहेब आंबेडकर यांच्या भालोद भेटीचे ऐतिहासिक महत्त्व अधोरेखित केले. या भेटीचा भालोदवासीयांना सार्थ अभिमान असल्याचे सांगत, येथे राष्ट्रीय स्तरावरील स्मारक उभारण्यासाठी सर्वतोपरी प्रयत्न करण्यात येतील, अशी ग्वाही त्यांनी दिली. तसेच या विषयावर लवकरच मुख्यमंत्री आणि संबंधित मंत्र्यांशी चर्चा करून स्वतंत्र बैठक आयोजित करण्यात येईल, असेही त्यांनी स्पष्ट केले.

(ads)

बाबासाहेबांच्या भेटीला ऐतिहासिक महत्त्व

यावेळी जयसिंग वाघ यांनी डॉ. बाबासाहेब आंबेडकर यांच्या भालोद भेटीमागील ऐतिहासिक पार्श्वभूमी विशद केली. ब्रिटिश सरकारने नियुक्त केलेल्या ओ. बी. एच. स्टार्ट समितीच्या माध्यमातून या भागातील अस्पृश्य आणि आदिवासी समाजाच्या सामाजिक, आर्थिक व शैक्षणिक मागासलेपणाचा अभ्यास करण्यासाठी बाबासाहेब भालोद येथे आले होते, असे त्यांनी नमूद केले. त्यामुळे या भेटीला अनन्यसाधारण ऐतिहासिक महत्त्व असून, तिच्या स्मृती जतन करण्यासाठी भालोद येथे प्रेरणास्तंभ व प्रेरणाभूमी उभारणे आवश्यक असल्याचे त्यांनी सांगितले.

(ads)

विविध मान्यवरांची उपस्थिती

या प्रसंगी महाराष्ट्र जनमोर्चाचे अध्यक्ष मुकुंद सपकाळे, गोपाळ भालेराव, ॲड. आनंद कोचुरे, रमेश तायडे, नथू अहिरे, बाबुराव वाघ, दिलीप तासखेडकर, दिलीप सपकाळे, चंद्रगुप्त सुरवाडे, प्रसिद्ध सामाजिक कार्यकर्ते प्रदीप सपकाळे, मनीष साबळे, मिलिंद भालेराव, बाबा साळुंके आदी कार्यकर्ते उपस्थित होते.

(ads)

डॉ. बाबासाहेब आंबेडकर यांच्या ऐतिहासिक भेटीच्या स्मृती जतन करण्यासाठी भालोद येथे प्रेरणास्तंभ व प्रेरणाभूमी उभारण्याची मागणी आता पुढे आली असून, याबाबत शासनस्तरावर कोणती पावले उचलली जातात, याकडे परिसरातील नागरिकांचे लक्ष लागले आहे.