वंचित बहुजन आघाडीच्या तक्रारीची गटशिक्षणाधिकाऱ्यांकडून दखल : नमूने तपासणीच्या अहवालानंतर होणार कारवाई
भुसावळ शहरातील तु.स.झोपे शाळेत विद्यार्थ्यांना वाटप होणाऱ्या शालेय पोषण आहारात सावळा गोंधळ सुरू असल्यासह वाटप होणाऱ्या दाळींसह तांदळाचा दर्जा अत्यंत सुमार असल्याचा आरोप गुरुवार, 5 मे रोजी वंचित बहुजन आघाडीने गटशिक्षण अधिकारी किशोर वायकोळे व विस्तार अधिकारी तुषार प्रधान यांच्याकडे लेखी तक्रार करून नोंदवल्यानंतर अधिकाऱ्यांनी लागलीच तु.स.झोपे शाळा गाठून गोदामाला सील लावले. पोषण आहार अधीक्षकांच्या उपस्थितीत गोदामातील धान्याची तपासणी करण्यात येणार असून नमूने तपासणीसाठी पाठवण्यात आल्यानंतर येणाऱ्या अहवालाअंती दोषींवर कारवाई केली जाईल, असे सूत्रांनी सांगितले.[ads id="ads2"]
पोषण आहारात गोलमाल होत असल्याचा आरोप
भुसावळ शहरात शालेय पोषण आहार वाटपात मोठ्या प्रमाणावर गोलमाल होत असल्याचा आरोप वंचित बहुजन आघाडीने केला आहे. या प्रकारात संबंधित अधिकारी व कंत्राटदार यांच्या संगनमताने निकृष्ट दर्जाचे धान्य वाटप भुसावळ शहरामध्ये विद्यार्थ्यांना होत असल्याने दोषींवर कारवाईची मागणी वंचितचे जिल्हाध्यक्ष विनोद सोनवणे व पदाधिकाऱ्यांनी केली आहे.
शहरातील तु.स.झोपे विद्यालयात गुरुवारी अत्यंत सुमार दर्जाचा पोषण आहार वाटप केला जात असल्यासह अंदाजे विद्यार्थ्यांच्या पालकांना तांदुळासह दाळी दिल्या जात असल्याची तक्रार वंचित आघाडीने शिक्षण विभागाकडे केली होती. त्यानुसार गटशिक्षणाधिकारी किशोर वायकोळे व सहकाऱ्यांनी संबंधित शाळा गाठून गोदामाची पाहणी करीत वरीष्ठांशी संवाद साधला. पोषण आहार अधीक्षक नसल्याने तूर्त गोदामाला सील लावण्यात आले आहे.
