फैजपूर प्रतिनिधी (सलीम पिंजारी)
आमोदे ता.यावल येथील घनश्याम काशीराम विद्यालयात सन २०२२-२३ वार्षिक पारितोषिक वितरणाचा कार्यक्रम जिल्हा शिक्षण व प्रशिक्षण संस्था (डायट) प्राचार्य डॉ. अनिल झोपे यांच्या अध्यक्षतेखाली घेण्यात आला. गुणवंत विद्यार्थ्यांसाठी ठेवीदारांनी ठेवलेली ४,३९,४४८ रकमेवरील रुपये २८,३५२ चे वार्षिक पारितोषिक समारंभात मान्यवरांच्या हस्ते वितरण करण्यात आले. याप्रसंगी प्रमुख अतिथी म्हणून जिल्हा शिक्षण व प्रशिक्षण संस्थेच्या अधिव्याख्याता डॉ. संगीता महाजन या होत्या. [ads id="ads1"]
अनुभव ही खूप मोठी शिदोरी असते. यश प्राप्तीसाठी अथक परिश्रमाची गरज असून जीवनात भावनिक बुद्धिमत्ता व चांगुलपणा याही गुणांचा विकास केला तर यश अधिकच सुंदर दिसेल अशी अपेक्षा कार्यक्रमाचे अध्यक्ष डॉ. अनिलजी झोपे यांनी आपल्या अध्यक्षीय भाषणातून व्यक्त केली. [ads id="ads2"]
या प्रसंगाचे औचित्य साधून डॉ. संगीता महाजन यांच्या हस्ते 'आनंदी वारली मनाला भावली' या विद्यार्थी व शिक्षकांसाठी असलेल्या मुख्यमंत्री माझी शाळा सुंदर शाळा या अंतर्गत उपक्रमाचे उद्घाटन करण्यात आले नुकतेच डायटच्या वतीने डॉ. संगीता महाजन यांच्या मार्गदर्शनाखाली व डायट प्राचार्य डॉ. अनिल झोपे यांच्या प्रेरणेतून मुख्याध्यापक एस. बी. बोठे यांनी वारली कलेचे प्रशिक्षण घेतले होते. मुख्याध्यापकांनी शिक्षक व विद्यार्थ्यांना प्रशिक्षण देऊन शालेय भिंतींची रंगरंगोटी मुख्यमंत्री माझी शाळा सुंदर शाळा या अभियानांतर्गत करून घेण्याबाबतचा मानस व्यक्त केला.
वारली कला विद्यार्थी व शिक्षकांना अध्ययन अध्यापनात कशी उपयोगी आहे याची उदाहरणे डॉ.संगीता महाजन यांनी आपल्या मनोगतातून व्यक्त केली.
कार्यक्रमाचे अध्यक्ष यांचा सत्कार संस्थेचे उपाध्यक्ष विनायक दादा पाटील यांनी तर प्रमुख अतिथी यांचा सत्कार प्रा. उमाकांत पाटील यांच्या हस्ते करण्यात आला. कार्यक्रम प्रसंगी शालेय समिती चेअरमन ललित महाजन,
सदस्य धनराज चौधरी, प्रमोद वाघुळदे, प्रवीण महाजन, नामदेव पाटील, वैभव चौधरी, श्री एकनाथ लोखंडे व शाळेचे माजी मुख्याध्यापक के. एच .पाटील उपस्थित होते.
कार्यक्रमाचे प्रास्ताविक मुख्याध्यापक संजीव बोठे यांनी केले तर शिक्षक मनोगत सौ. लीना इंगळे विद्यार्थी मनोगत कु. डिंपल सरोदे, कु. आम्रपाली तायडे यांनी केले. सूत्रसंचालन श्री ईश्वर चौधरी सर यांनी तर आभार सौ चारुलता महाजन यांनी व्यक्त केले शिक्षक शिक्षकेतर कर्मचारी यांनी कार्यक्रम यशस्वीतेसाठी परिश्रम घेतले.
